Lifðu eins og meistari

Meistari dagsins

18.nóvember: Grétar Örn Guðmundsson

Síðastur í seríu af meisturum dagsins er meistarinn Grétar Örn Guðmundsson. Grétar er á lokaári í Konunglega Arkítektaskólanum í Kaupmannahöfn og tekur hann þátt í Meistaramánuði annað árið í röð. Fyrir vinnuhesta og fagmenn eins og Grétar er ekki stór hindrun að rífa sig á fætur 5:45 en það getur verið heljarinnar áskorun að ná löngum og góðum nætursvefn. Tökum af ofan fyrir Grétari Erni!

Hver er ástæðan fyrir því að þú ákvaðst að taka þátt?

Ég er á kafi í lokaverkefninu mínu í arkitektaskólanum sem á að skila um miðjan desember. Mér fannst því upplagt að taka þátt í meistaramánuðinum og koma meiri reglu á daglegu rútínuna mína sem einkennist af mikillri tölvuvinnu og kaffidrykkju.

Hver eru þín helstu markmið í mánuðinum?

Að vakna fyrir kl 6 alla daga vikunnar, hlaupa 25 km á viku, sofa a.m.k. 7 klst á nóttunni og hjóla með hjálm (það þykir ekki sjálfsagður hlutur í Kaupmannahöfn).

Hvað hefur verið erfiðast?

Án efa að ná markmiðinu að sofa 7 klst á dag. Þetta hljómar auðvitað fáranlega, en síðastliðin ár hef ég verið að vinna mikið í skólaverkefnum fram eftir á nóttunni. Ég á ekki í neinum erfiðleikum með að rífa mig á lappir kl 5.45 en það hefur verið mjög erfitt að slökkva á tölvunni kl 23 á kvöldin og fara í háttinn. Verð að viðurkenna að það hefur ekki tekist á hverju kvöldi.

Skilaboð sem þú vilt koma á framfæri til annara meistara:

Meistaramánuðurinn er frábær hvatning til þess að tileinka sér betri og heilsusamlegri venjur! Hvet alla meistara til þess að halda áfram og viðhalda þessu nýja lífstíl þó að mánuðurinn klárist í næstu viku. Ég get allavega lofað ykkur því að þið munið sjá mig hjólandi um götur Kaupmannahafnar með hjálminn á hausnum.

Vefsíður sem gaman er að skoða í meistaramánuðinum: 

Því miður er arkitektúr eina sem hefur komist að í huga mínum síðastliðna mánuði svo hérna eru tvær síður sem ég skoða alltaf með morgunkaffinu. http://www.archdaily.com/, http://www.dezeen.com/

Meistari dagsins

18. Nóvember: Baldur Kristjánsson

Stjörnuljósmyndarinn, Þróttarinn, ferðamaðurinn og keisarinn, Baldur Kristjánsson, er meistari dagsins. Baldur, sem er 28 ára, er að takast á við Meistaramánuðinn af stakri fagmennsku og syndir bæði í sjó og sundlaugum landsins. Þá hefur hann þurft að samræma ferðalög vegna vinnu og meistaralífsstílinn og sást meðal annars hlaupa upp tröppurnar við kirkjuna á Akureyri fyrr í mánuðinum. Við tókum hús á Baldri. 

Hver er ástæðan fyrir því að þú ákvaðst að taka þátt?

Fylgdist með átakinu í fyrra einsog sjúkur stalker. Var inná öllum bloggum, like-andi allar færslur og sendandi aðdáendapósta á meðlimi MM - og var staðráðinn í að ári liðnu myndi ég taka þátt. MM kom á kærkomnum tíma þar sem það voru ýmsir hlutir sem máttu fara detta í betra horf hjá mér - allt frá skipulagningu til hreyfingar.

Hver eru þín helstu markmið í mánuðinum?

Fyrst og fremst er það að bæta mig sem einstakling; andlega, líkamlega, vinnulega og í persónulega lífinu. Mér finnst það vera það fallega við Meistaramánuðinn að þetta er ekki bara eitthvað fitubolluátak heldur snýst fyrst og fremst að bæta sig sem einstakling. Ef að einhver heimsækir ömmu sína og afa oftar en vanalega með tilkomu MM þá er tilganginum strax náð. 

Hvað hefur verið erfiðast?

Erfiðast var klárlega að hætta alfarið að drekka bjór og nota tóbak.

Skilaboð sem þú vilt koma á framfæri til annara meistara:

Held að núverandi meistarar viti nákvæmlega hversu fokking góð tilfinning það er að vera svona stutt frá endalínunni og vera búinn að standast áskorunina (að mestu leyti a.m.k.). Ég vil frekar segja við verðandi meistara að það er meistaramánuður að ári liðnu.

Linkur á blogg ef þú ert með meistarablogg:

http://bktimes.tumblr.com/

Vefsíður sem gaman er að skoða í meistaramánuðinum:

http://www.globalchampionmonth.com/

Hingað sæki ég hreinlega allan minn fróðleik varðandi hin ýmsu mál. Stefni að því að vera búinn að koma mér upp mínum eigin forða fyrir næsta ár.

Annað:

Meistaramánuðrinn var nákvæmlega sem ég þurfti til að ýta mér af stað. Ætla að halda áfram að taka það besta mánuðinum og tileinka mér hina mánuði ársins. Þrátt fyrir að ég muni ekki lifa eins extreme einsog síðasta mánuðinn og geti ekki beðið eftir því að slaka einum skítköldum mjöð þá er ég líka farinn að hlakka til Meistaramánaðarins 2012. 

Meistarar í Hollandi

Meistaramánuðinum barst afar skemmtilegt bréf:

Kæru meistarar, 

eftir að við sáum frétt á visi(r).is um meistaramánuðinn tókum við þá frábæru ákvörðun um að vera með. Þegar ég skrifa „við” þá á ég við mig, Pétur Oddberg Heimisson, Bjarna Guðmundsson, Önnu Völu Ólafsdóttur og Laufeyju Jensdóttur en við búum öll saman. 

Við stundum öll nám við Tónlistarháskólann í Utrecht í Hollandi. Það er alveg einstaklega hvetjandi fyrir okkur að búa saman á meðan við tökum þátt í þessu. Við ákváðum að breyta ansi miklu og við skrifuðum niður reglur sem hanga á ísskápnum. Einnig erum við með lista þar sem við skrifum niður hvenær við vöknum á morgnana.  

Við byrjuðum 24. október og í þessa rúmlega 18 daga sem eru búnir af mánuðinum þá finnum við öll mikinn mun á okkur. Við höfum meiri orku, komum meiru í verk og við upplifum á einhvern hátt meiri gleði.

Þrátt fyrir að vera með sameiginlegar reglur þá er hver og einn með sínar eigin reglur, sérstaklega þegar viðkemur hreyfingu. 

Til að mynda þá eru Bjarni og Pétur byrjaðir í áttaki þar sem þeir taka armbeygjur og magaæfingar áður en þeir halda í skólann. Markmiðið er að geta gert 100 armbeygjur og 250 magaæfingar eftir um það bil 2 mánuði.

Þegar kemur að mataræði þá er sykur, hveiti og ger ekki lengur í boði og djúpsteiktur matur er ekki leyfilegur. Hollendingar djúpsteikja nánast allt sem þeir komast nálægt og fyrir meistaramánuðinn þá voru strákarnir á heimilinu tíðir gestir á skyndibitastöðum þar sem ekki var hægt að fá neitt annað en djúpsteiktan mat. 

Mesta breytingin þegar kemur að mataræði er þó að sleppa brauðinu og pastanu. Brauð er eitthvað það þægilegasta sem hægt er að grípa í og pasta eitthvað það auðveldasta sem maður getur eldað þannig að nú þurfum við að eyða örlítið meiri tíma í að gera morgunmat og elda hádegismat og/eða kvöldmat.

Þar sem við höfum komið reglu á það hvenær við vöknum á morgnana þá er orðið miklu auðveldara að vakna fyrir kl. 8. “If you snooze, you loose” er eitthvað sem er gott að hafa í huga þegar þú ert að vakna . Á 18 dögum eru B mennirnir á heimilinu búnir að breytast í A eða A+ menn sem er mjög góð breyting. 

Við erum sammála um það að þetta sé án efa eitthvað það besta sem við höfum gert lengi og erum við gríðarlega þakklát fyrir að hafa tekið þá ákvörðun um að vera með. Eftir að mánuðinum lýkur þá er ansi líklegt að við munum reyna að halda þessu breytta líferni áfram á einhvern hátt.

Hollur eftirréttur, ávextir í skál. Einfalt og gott! :)

Mangó og kókosís og banana og avakatóís. Enginn viðbættur sykur og engar mjólkurvörur.

Bjarni og Pétur að gera magaæfingar.

Reglurnar sem hanga á ísskápnum.

Fyrir hönd meistaranna,

Pétur Oddbergur Heimisson

——

Við þökkum þeim Pétri, Bjarna, Önnu og Laufeyju kærlega fyrir þennan póst. Þið veitið okkur hinum innblástur!

Meistari dagsins

15.nóvember: Ebba Karen Garðarsdóttir

Ebba Karen Garðarsdóttir er 22 ára gamall Eyfirðingur að upplagi en er þó flutt á “mölina”, eins og við segjum, og stundar nú nám í verkfræði við Háskólann í Reykjavík. Hún stundar mikil hlaup í meistaramánuðinum ef marka má uppfærslur frá henni á Twitter þar sem þið finnið hana undir nafninu @ebbakaren. Einnig stefnir hún á að taka meistaramánuðinn skrefinu lengra og koma því jákvæða úr mánuðinum í lífsrútinuna. Ebba Karen er meistari dagsins þriðjudaginn 15 nóvember. 

Hver er ástæðan fyrir því að þú ákvaðst að taka þátt? 

Lífið er ekkert skemmtilegt nema maður skori á sjálfan sig! Svo var þetta fínn vettvangur til að rífa sig upp af rassinum og fara að hreyfa sig almennilega!

Hver eru þín helstu markmið í mánuðinum?

Þau eru að gera þennan mánuð að lífsstíl. Finna hina fullkomnu rútínu svo ég geti verið sátt við hana og haldið henni áfram fram út í óendanleikann! Og svo líka að prófa eitthvað nýtt í eldhúsinu. Ekkert skemmtilegra en að prófa nýja uppskrift sem er holl og bragðast fáranlega vel.

Hvað hefur verið erfiðast?

Þar sem ég er súkkulaði fíkill á háu stigi hefur verið talsvert erfitt að liggja ekki ofan í nammipokanum. Planið var að leyfa mér bara smááá á laugardögum en það endar oft á að vera talsvert meira en “bara smá”.

Skilaboð sem þú vilt koma á framfæri til annara meistara: 

Gerum þennan meistaramánuð að meistaraárum!

Linkur á meistarablogg: Ekkert svoleiðis í gangi núna en gæti hugsanlega byrjað með eitt ef vel til tekst að gera þennan meistaramánuð að lífsstíl!

Þrjár heimasíður sem gaman er að skoða í meistaramánuðinum:

globalchampionmonth.com

http://motivationintohabit.tumblr.com/

og loks uppskriftasíðan http://www.cafesigrun.com/

Meistari dagsins

14.nóvember: Hafsteinn Rannversson

Heimsborgarinn, nautnaseggurinn og bonsaimeistarinn Hafsteinn Rannversson er meistari dagsins mánudaginn 14 nóvember. Hafsteinn er 25 ára gamall og er búsettur í Kaupmannahöfn þar sem hann stundar mastersnám í lyfjavísindum. Hafsteinn er einn af þeim sem tekur meistaramánuðinn alla leið og hefur æft klukkan 6 á morgnana samhliða því að vera í prófalestri.

Hver er ástæðan fyrir því að þú ákvaðst að taka þátt?

Meistaramánuðurinn er skapaður og skipulagður af mínum nánustu vinum, svo ég hefði verið dáldið einn á báti ef ég hefði ekki tekið þátt. Auk þess er frábært að taka hlé frá hlutum sem eru einkennandi fyrir hina 11 mánuði ársins.  Þetta verður til þess að maður metur hlutina uppá nýtt og mun eflaust njóta þeirra betur. 

Hver eru þín helstu markmið í mánuðinum?

Vakna í kringum 6 á virkum dögum og fyrir 9 á laugardögum. Hvíldardaginn skal halda heilagan og því leyfi ég mér að sofa út á sunnudögum. Æfa mikið og vel alla virka morgna ásamt meistarabróður mínum Þorsteini Kára. Matarræði verður til fyrirmyndar og áfengi verður stillt í hóf. Ég er í prófum í MM svo markið var sett á að læra og lesa vel 6-7 tíma á dag og klára allt lesefni fyrir próf. Ég á 2 bræður og búum við allir í sitthvoru landinu bræðraböndin verða styrkt í mánuðnum. Einnig er ég með nokkur leyndarmálsmarkmið sem ég ætla að halda fyrir mig.

Hvað hefur verið erfiðast?

Hingað til hefur ekkert eitt verið erfiðara en annað en þessi stóra heildarbreyting hefur ekki verið létt verð ég að viðurkenna. Þegar svona mörgu er breytt í einu þarf líkami minn meiri svefn en ég hef verið að veita honum og því hef ég verið lurkum laminn lungað úr mánuðnum. 1-2 æfingar hafa einnig dottið út vegna prófa en það verður bara að vera þannig.  Núna er prófunum hinsvegar lokið og því leyfi ég mér að sofa út og vakna kl. 7 seinustu vikuna. 

Skilaboð sem þú vilt koma á framfæri til annara meistara?

Sýnum styrk og sæmd og styðjum hvort annað. Það á að hafa gaman af MM og varast skal að taka hlutunum of alvarlega, eða eins og maðurinn sagði: “It’s all water duuuuude”

Meistari dagsins

11.nóvember: Þorsteinn Kári Jónsson

Einn af upphafsmönnum meistaramánaðarins er Þorsteinn Kári Jónsson. Þorsteinn er 25 ára og býr í Kaupmannahöfn þar sem hann lýkur meistaraprófi frá Copenhagen Business School næstkomandi sumar. Hann hefur notað meistaramánuðinn undanfarin ár til þess að koma hlutum í fasta rútínu lífs sins og er m.a. duglegur að elda og býr um rúmið sitt á hverjum einasta morgni, hlutir sem hann vandi sig á í meistaramánuði. Þorsteinn er í raun sönnun þess að meistaramánuðurinn getur leitt gott af sér til lengri tíma litið því Þorsteinn hefur verið duglegur við að setja sér háleit markmið í mánuðinum, bæði líkamleg jafnt sem andleg. Hann hefur eins og myndin sýnir ekkert að fela í meistaramánuðinum þetta árið og stefnir á að gefa sjálfum sér skemmtilega jólagjöf þetta árið. Þorsteinn Kári Jónsson er meistari dagsins föstudaginn 11.11.11.

Hver er ástæðan fyrir því að þú ákvaðst að taka þátt?

Ef ég myndi ekki taka þátt í Meistaramánuðinum þá væri ég vægast sagt mikill hræsnari. En ég vil líka meina að líf mitt hafi tekið stórstígum framförum síðan ég tók fyrst þátt í meistaramánuðinum. Nú eru hlutir í rútínunni minni sem mig dreymdi aðeins um að geta vanið mig á fyrir nokkrum árum. Þar ber kannski helst að nefna það hvað ég elda mikið heima hjá mér, hvað ég hreyfi mig reglulega og hvað ég bý fallega um rúmið mitt á hverjum morgni.

Hver eru þín helstu markmið í mánuðinum? 

Ég er að reyna að þræla mér í gegnum Biblíuna í fyrsta sinn, það er líklega mitt stærsta markmið. Annars þá vakna ég um klukkan 6 á hverjum morgni og fer í ræktina, ég hef einsett mér það að gefa sjálfum mér sixpakk í jólagjöf í ár. Ég sleppi því líka alveg að fá mér áfengi í mánuðinum ásamt því að snæða sirka 95% einsog hellisbúi, undantekningarnar mínar eru kaffi og hafragrautur. 

Hvað hefur verið erfiðast? 

Erfiðast hingað til er að lesa reglulega í biblíunni. Hún á það til að vera óskaplega hæg og þung á köflum og Mósebækurnar voru alveg að fara með mig á tímabili. Sem betur fer koma krassandi sögur inn á milli sem fleyta manni á milli kafla. Ég veit samt líka að síðustu 10 dagarnir eru venjulega mjög erfiðir, það er einmitt þá sem maður fer að hugsa um það hvað maður hefur nú verið duglegur og að maður eigi í raun skilið að slaka aðeins á. Ég get hinsvegar fullyrt um það að það er hreint út sagt stórkostleg tilfinning sem bíður manns handan við síðasta daginn. Það er svo sannarlega þess virði að sýna aga og sjálfstjórn út allan mánuðinn.

Skilaboð sem þú vilt koma á framfæri til annara meistara?

Mér finnst mikilvægast að muna að það besta við meistaramánuðinn er að við erum að gera þetta saman. Verum dugleg að hvetja hvort annað til dáða og tala saman um það hvernig okkur gengur. 

Linkur á meistarablogg: sviti.tumblr.com

Þrjár heimasíður sem gaman er að skoða í meistaramánuðinum: 

www.globalchampionmonth.com , 

http://www.coachmarian.de/Spezials/Workouts/Workoutentrance.htm 

og http://www.myfit.ca/

Annað:

Ég hvet alla meistara til þess að muna að þó að mánuðinum ljúki brátt þá erum við í þessu til þess að halda áfram að vera meistara restina af lífi okkar.

Meistari dagsins

10.nóvember: Elísabet Ólafsdóttir

Meistari dagsins drekkur hvorki né reykir og tekur mataræðið alla jafna föstum tökum. Einhver myndi spyrja sig hvort að þessi meistari þurfi á einhverjum meistaramánuði að halda. Meistari dagsins er hinsvegar gangandi dæmi um hvernig við getum öll bætt okkur á einhverjum sviðum og sett okkur háleit markmið. Þetta er 34 ára bókmenntafræðingurinn Elísabet Ólafsdóttir. Eitt af markmiðum hennar er að finna vinnu, atvinnurekendur: grípið tækifærið og nælið í þennan meistara áður en einhver annar gerir það! Sjá: http://www.linkedin.com/in/betan

Hver er ástæðan fyrir því að þú ákvaðst að taka þátt:

Ég rakst á þetta kvöldið áður en leikar hófust og einfaldlega fylltist andagift og krafti. Mér fannst þetta frábær hugmynd og æðislegt að vera með fólki sem ég þekki ekki neitt og deila með þeim þessari þörf að vilja vera betri í dag en í gær. Um leið og ég var búin að lesa um hvað málið snerist prentaði ég út dagatalið og setti mér markmið fyrir hvern einasta dag mánaðarins og þetta gengur eins og í sögu. Góðri sögu.  

Hver eru þín helstu markmið í mánuðinum:

Mín helstu markmið eru að skrifa bók, læra á internetið, elda nýjan mat, syngja og dansa. Svo tók ég áskorun eiginmannsins um að hola út eitt fjall á landinu hans í Minecraft og er það orðið takmark mánaðarins…hitt eru svona dagsmarkmið. Já…og svo ætla ég líka að finna vinnu.

Hvað hefur verið erfiðast:

Þar sem ég drekk hvorki né reyki og er almennt á svolítið harkalegu mataræði sökum sykuróþols þá er ég kannski á aðeins öðrum stað en þeir sem eru að taka neysluna í gegn. Það sem hefur verið mér erfiðast hingað til er að hola út fjallið. Þótt ég sé með demantaaxir. Þetta er kreisi stórt fjall. 

Skilaboð sem þú vilt koma á framfæri til annara meistara:

Takk fyrir að vera til fyrir mig. Mér finnst æðislegt að lesa bloggin ykkar og finna kraftinn sem býr undir þessu átaki. Án annarra meistara væri ég ekki meistari. 

Linkur á meistarablogg:

meistaramanudurbetu.tumblr.com

Vefsíður sem þú mælir með í Meistaramánuðinum:

http://quantifiedself.com/

http://www.pomodorotechnique.com/

http://www.davidco.com/about-gtd

Meistari dagsins

9.nóvember: Rannveig Rúnarsdóttir

Næsti meistari dagsins er ljósmóðirin, verkefnastjórinn og gleðipinninn Rannveig Rúnarsdóttir. Rannveig er 48 ára gömul og er búsett í Reykjavík. Alheimsvefurinn vildi ekki leyfa okkur að finna mynd af Rannveigu í fyrstu, aðstandendur meistaramánaðar deyja þó ekki ráðalausir og fundum við mynd af henni gegnum facebook (en ekki hvað). Á myndinni sést einnig golfarinn og eiginmaður Rannveigar, Kári Tryggvason og elsta dóttir þeirra hjóna hún Hildur.

Hver er ástæðan fyrir því að þú ákvaðst að taka þátt?

Áskorun.

Hver eru þín helstu markmið í mánuðinum? 

Auka hreyfingu á mismunandi tímum.

Hvað hefur verið erfiðast? 

Fara út á morgnanna

Skilaboð sem þú vilt koma á framfæri til annara meistara:

“Frábært á meðan og eftir á”

Annað: Þið eruð snillingar að finna upp á þessu, Til hamingju með ykkur!

Meistari dagsins

8.nóvember: Arnaldur Grétarsson

Lífsfagmaðurinn, kaffidrykkjuáhugamaðurinn og farandverkamaðurinn Arnaldur Grétarsson er næsti meistari dagsins. Arnaldur er búsettur í Reykjavík og tekur þátt í meistaramánuðinum annað árið í röð.

Hver er ástæðan fyrir því að þú ákvaðst að taka þátt? 

Af því að ég er orðinn alltof feitur og latur og mig langar ekki til að vera það. Svo er þetta líka bara töff.

Hver eru þín helstu markmið í mánuðinum?

Mín nálgun á þennan mánuð er sú að þetta sé tækifæri til að ýta úr vör og festa í sessi eitthvað sem maður hefur áhuga á, en lætur kannski af einhverjum ástæðum sitja á hakanum. Ég hef einsett mér að koma meiri reglu á matarræðið mitt, og líkamsrækt, auk þess sem ég ætla að endurvekja gömul áhugamál eins og júdó og fjallgöngur. Svo eru líka andlegir þættir sem ég hef sett niður en þeir lúta að því að auka færni á ýmsum sviðum (s.s. gítarspil og teiknun) og hverfa frá þeim doða sem á það til að einkenna þennan málaflokk ef maður passar sig ekki.

Hvað heldur þú að verði erfiðast? 

Ég talaði nú eitthvað um að draga saman áfengisneysluna mína að nær öllu leyti. Mér finnst bjór bara svo ofboðslega góður. Annars held ég að það verði almennt erfiðast að sýna þá festu sem þarf til að halda út prógrammið í þennan heila mánuð. En til þess er jú leikurinn gerður.

Skilaboð sem þú vilt koma á framfæri til annara meistara: 

Leið samúræjans er afdráttarlaus. Hafi maður einsett sér að fullfremja eitthvert verk, þýðir ekki að nálgast það eftir krókaleiðum. Að vegnum kostum og göllum er best að einhenda sér í verkin og ráðast að þeim með áhlaupi.

Linkur á meistarablogg:

http://www.arnaldur.org

Annað:

Þetta meistarar sig ekki sjálft!

Meistari dagsins

7.nóvember: Eva Þóra Karlsdóttir

Meistaramánuðurinn er alþjóðlegur og í dag eins og svo oft áður leitum við út fyrir landssteinana eftir meistara dagsins. Eva Þóra Karlsdóttir er 24 ára mastersnemi í Alþjóðastjórnun. Eva býr í Gautaborg í Svíþjóð segist geta lifað af guacamole og súkkulaði. Eva er meistari dagsins 7.nóvember.

Hver er ástæðan fyrir því að þú ákvaðst að taka þátt?

Mig hefur lengi langað til þess að taka sjálfa mig aðeins á, hreyfa mig, borða hollara og skipuleggja mig betur. Þar sem að ég er nýlega flutt til Svíþjóðar fannst mér meistaramánuðinn vera snilldar tækifæri til þess að koma mér upp nýjum venjum á þessum nýja stað. 

Hver eru þín helstu markmið í mánuðinum?

Borða hollara (sleppa öllu nammi og öllum kökum), elda meira heima, vakna fyrir allar aldir og fara í ræktina á morgnanna, byrja að klifra, tækla sænskuna á fullu, gefa mér tíma til þess að sinna ljósmyndunaráhugamálinu mínu og svo einfaldlega að brosa og hafa gaman af þessu öllu.

Hvað hefur verið erfiðast?

Að vakna klukkan sex á morgnanna hefur af og til verið frekar erfitt sökum mjög slæmrar snooze áráttu. Meðalið við því hefur einfaldlega verið það að hugsa um hversu miklu ég verð búin að koma í verk þegar klukkan er loksins orðin átta.. og það svínvirkar

Skilaboð sem þú vilt koma á framfæri til annara meistara?

Það eitt að brosa gerir allt miklu auðveldara :)

Linkur á meistarablogg: 

www.evathora.blogspot.com

Vefsíður sem gaman er að skoða í meistaramánuðinum:

www.cafesigrun.com - klárlega besta samansafn af hollum uppskriftum sem að til er á íslensku, algjör snilld!

www.ted.com - fullt af fólki troðfullu af visku og hvatningu sem fá mann til þess að vilja ná langt og gera það sem manni dettur í hug.

Meistari dagsins

4.nóvember: Pétur Halldórsson

Meistari dagsins að þessu sinni er 23 ára líffræðingur og starfar við Biophilia verkefni Bjarkar Guðmundsdóttur. Meistarinn heitir Pétur Halldórsson og iðkar MovNat að krafti. Pétur stendur meðal annars fyrir námskeiði í svokallaðri Rocky útiþjálfun.

Pétur in action.

Hver er ástæðan fyrir því að þú ákvaðst að taka þátt?

Meistaramánuðurinn passar akkúrat inní það sem ég vil gera; bæta sjálfan mig!

Hver eru þín helstu markmið í mánuðinum?

Halda áfram að æfa MovNat, legg líklegast áherslu á klifur, sund og jafnvægi.

Eyða sem mestum tíma úti í náttúrunni, byrjaði á því að gista í Jökulheimum um helgina.

Taka mér lengri tíma í stórar (og fáar) máltíðir.

Losna við VISA-reikninginn.

Hvað heldur þú að verði erfiðast?

Að borða ekki milli máltíða.

Skilaboð sem þú vilt koma á framfæri til annara meistara:

‚Perfection is achieved, not when there is nothing more to add, but when there is nothing left to take away.‘ –Antoine de Saint-Exupéry

Þrír áhugaverðir linkar til að skoða í meistaramánuðinum:

www.movnat.com

www.ancestryfoundation.org

www.hunter-gatherer.com

Rocky útiþjálfun:

https://www.facebook.com/event.php?eid=131568146946547

Meistari dagsins

3.nóvember: Sigþór Júlíusson

Að þessu sinni höldum við til Lúxembourg til að fylgjast með meistara dagsins. Sigþór Júlíusson er fyrrum knattspyrnuhetja sem á allnokkra titlana í vasanum og ber þar helst að nefna 4 Íslandsmeistara titla sem unnust með KR á árunum 1999-2003. Sigþór býr sem fyrr segir í Lúxembourg um þessar mundir þar sem hann starfar sem framkvæmdastjóri hjá CrossFit Valens þar í landi.

Hver er ástæðan fyrir því að þú ákvaðst að taka þátt? 

Frábært og skemmtilegt framtak og um að gera að skora sjálfan sig aðeins á hólm.

Hver eru þín helstu markmið í mánuðinum?

- Vakna allfaf kl 7 og borða góðan og hollan mat, alla daga.

- Ekkert sælgæti, gos, skyndibita eða áfengi.

- Æfa 5-6 sinnum í viku.

- Lesa 1 góða bók og minnka tölvunotkun heima hjá mér.

- Klára hluti sem ég hef trassað að klára og lifa sparlega.

Hvað heldur þú að verði erfiðast?

Bókalesturinn

Hvernig er stemningin fyrir meistaramánuðinum í Lúxembourg? 

Stemmingin er góð en ekki mjög margir sem eru virkir þáttakendur. Fólk talar þó um meistaramánuðinn og tekur ýmsa hluti í gegn, en betur má ef duga skal. Verður pottþétt meiri og betri þáttaka að ári.

Geturu nefnt þrjár heimasíður sem skemmtilegt er að skoða í meistaramánuðinum?

crossfit.com – happ.is – og meistaraheimasíðurnar: manutd.com og krreykjavik.is

Skilaboð sem þú vilt koma á framfæri til annara meistara?  

Njótið lífsins og verið góð við hvert annað.

Linkur á meistarablogg:

Ég er ekki með blogg en endilega setja like á CrossFit Valens á facebook.

Meistari dagsins

2.nóvember: Hannes Rannversson

Körfuknattleiksvélin og Verzlingurinn Hannes Rannversson er meistari dagsins. Hannes er fulltrúi yngri kynslóðarinnar og tekur þátt fyrir tilstuðlan eldri bróður síns, Hafsteins. Hafsteinn er staddur í Kaupmannahöfn en Hannes í Reykjavík en þeir bræður hafa sett sér metnaðarfullt sameiginlegt markmið - að taka 100 armbeygjur í lok mánaðar.

Hver er ástæðan fyrir því að þú ákvaðst að taka þátt?

Helsta ástæðan er líklegast sú að Hafsteinn bróðir minn hvatti mig til þess að taka þátt.

Hver eru þín helstu markmið í mánuðinum?

Ég og Haffi settum okkur sameiginlegt markmið að ná 100 armbeygjum í lok mánaðar, en annars bara að borða hollt, æfa vel og stunda námið af kappi. 

Hvað heldur þú að verði erfiðast?

Ætli það verði ekki að hætta að borða eitthvað ruslfæði.

Skilaboð sem þú vilt koma á framfæri til annara meistara?

Eftir meistaramánuðinn eiga menn að geta að geta sagt við sjálfa sig: “Djöfull er ég HRIKALEGUR”!